დემოკრატიის ინსტიტუტის საგრანტო პროგრამა მოიცავს ორ სტრატეგიულ მიმართულებას:

1) აჭარის რეგიონში მოქმედი, დამწყები არასამთავრობო ორგანიზაციების მხარდაჭერას, მცირე გრანტების გაცემის, ტექნიკური მხარდაჭერის აღმოჩენის და ინსტიტუციონალურად განვითარების ხელშეწყობის გზით;

2) დემოკრატიის ინსტიტუტის მიერ ჩამოყალიბებული სასწავლო ცენტრის წარჩინებულ მსმენელთა ,,სასწავლო გრანტით’’ დაჯილდოებას.

საგრანტო პროგრამა მოქმედებს ევროკავშირის მხარდაჭერით მიმდინარე პროექტის ,,აჭარის რეგიონში არასამთავრობო ორგანიზაციების პოტენციალის, რესურსების და შესაძლებლობების განვითარება’’-ს ფარგლებში. 

საგრანტო პროგრამა პირველ ეტაპზე დააფინანსებს კონკურსის გზით შერჩეულ იმ ორგანიზაციების პროქტებს, რომლებსაც სხვადასხვა მიზეზთა გამო არ გააჩნიათ საგრანტო პროექტების განხორციელების გამოცდილება, ან აქვთ მცირებიუჯეტიანი პროექტის განხორციელების გამოცდილება.

კონკურსში მონაწილე ორგანიზაციისთვის სავალდებულო პირობაა საგრანტო კონკურსის გამოცხადების პერიოდში ფუნქციონირებდეს (ახორციელებდეს გარკვეულ საქმიანობას) და კონკურსის გამოცხადების დროისთვის წარმოადგენდეს უკანასკნელი ოთხი წლის ფარგლებში რეგისტრირებულ არაკომერციულ (არასამეწარმეო) იურიდიულ პირს.

საგრანტო კონკურსის პრიორიტეტებს განსაზღვრავს დემოკრატიის ინსტიტუტი სპეციალურად ამ მიზნით ჩატარებული კვლევების, შეფასებების და ქვეყანაში/რეგიონში არსებული სოციალური, ეკონომიკური და პოლიტიკური ვითარების ანალიზის საფუძველზე.

საგრანტო კონკურსში მონაწილეობის მიღების წესი, პირობები და ყველა შესაბამისი პროცედურა დადგენილია დემოკრატიის ინსტიტუტის მიერ, რომელიც შეგიძლიათ იხილოთ მიმდინარე კონკურსებში.